Россиянинг тинчлик режаси деярли тайёр

Россия низони тинч йўл билан ҳал этиш бўйича меморандум лойиҳасини тайёрлашни якунламоқда ва яқин келажакда уни Украина томонига топширишни режалаштирмоқда . Бу ҳақда Федерация Кенгаши раиси ўринбосари ва Халқаро алоқалар қўмитаси аъзоси Константин Косачев маълум қилди.

"Меморандум бўйича Россия ишланмалари яқин кунларда қарама-қарши томонга ўтказилишини кутмоқдаман. "Менда бу маълумот бор", деди у "Звезда" телеканалига берган интервюсида.

Унинг сўзларига кўра, ҳужжат устида ишлаш якуний босқичда . Косачевнинг таъкидлашича, лойиҳадаги шартлар ҳали ошкор этилмайди.

Меморандум ғояси Россия ва АҚШ президентлари Владимир Путин ва Доналд Трампнинг 19-май куни бўлиб ўтган телефон суҳбатидан сўнг муҳокама мавзусига айланди.

Путин шундан сўнг Москва Украина томони билан “тегишли келишувларга эришилса, маълум муддатга мумкин бўлган ўт очишни тўхтатиш тамойиллари”ни ўз ичига оладиган ҳужжат устида ишлашга тайёрлигини айтди.

Бундан олдин, 16 май куни Истанбулда Россия ва Украина делегациялари ўт очишни тўхтатиш шартлари рўйхатини алмашишга келишиб олдилар.

Учрашув якунлари бўйича Россия делегацияси раҳбари Владимир Мединский томонлар келажакдаги ўт очишни тўхтатиш бўйича ўз қарашларини батафсил баён этиш зарурлиги тўғрисида келишувга эришганини маълум қилди.

Ҳужжатни тайёрлаш фонида Россия ТИВ юридик департаменти директори Максим Мусихин меморандумни имзолаш учун Украина ўз президентини ўзгартириши кераклигини айтди.

Унинг сўзларига кўра, Владимир Зеленский “ташқи эмас, балки ички қонунийликни ҳам анчадан бери йўқотган”.