Россияликлар кимларни душман деб ҳисоблайди?

Украинани душман давлат деб биладиган Россия фуқароларининг улуши 2014 йилдан буён энг паст даражага тушди. Бу ҳақда 19 май, душанба куни эълон қилинган Бутунроссия жамоатчилик фикрини ўрганиш марказининг (ВТСИМ) ҳисоботида маълум қилинган. ВТСИМ томонидан 2025 йил апрель ойида ўтказилган сўровда иштирокчиларнинг 38 фоизи Украинани Россия Федерацияси билан "энг кескин, душманлик муносабатлари мавжуд" мамлакатлар қаторига киритган.

Ҳужжатда таъкидланишича, Россия Қримни ўзига қўшиб олган ва Украина шарқида ҳарбий ҳаракатларни бошлаган 2014 йилда бу кўрсаткич 32 фоизни, 2018 йилда 39 фоизни, 2019 йилда 53 фоизни, 2022 йилда эса 43 фоизни ташкил этган. Шундай қилиб, ҳозирда Украина, сўров натижаларига кўра, Россия учун "энг душман" давлатлар рўйхатида тўртинчи ўринни эгаллаб турибди. Уч йил олдин у АҚШдан кейин иккинчи ўринда турган эди.

Ўз навбатида, сўнгги 11 йил давомида россияликларнинг 67-76 фоизи душман деб ҳисоблаб келган Америка Қўшма Штатлари бугунги кунда 27 фоиз кўрсаткич билан атиги бешинчи ўринни эгаллаб турибди.

Ҳозирда россияликлар учта асосий душман сифатида Франция (сўровда қатнашганларнинг 48 фоизи), Буюк Британия (42 фоиз) ва Германияни (41 фоиз) кўрсатишмоқда. Биринчи ўнталикка шунингдек, Полша (26 фоиз), Латвия, Литва, умуман олганда Болтиқбўйи давлатлари ва "Европа Иттифоқи/Европа мамлакатлари" (ҳар бири 9 фоиздан) ҳам кирган. Тегишли савол очиқ тарзда берилган бўлиб, респондентларга бештадан ортиқ бўлмаган жавобни ўзлари кўрсатишлари таклиф этилган.