Россияга алоқадор хакерлар Италия элчихоналари сайтлари ва қишки Олимпия ўйинлари ўтказиладиган объектларга ҳужум қилди

Бу ҳақда The Insider хабар берди.

Италия ташқи ишлар вазири Антонио Таянининг маълум қилишича, мамлакат хавфсизлик хизмати қишки Олимпия ўйинлари объектлари ва ташқи ишлар вазирлигининг хориждаги ваколатхоналарига киберҳужум амалга оширилганини аниқлаган.

Хакерларнинг нишонлари орасида Италиянинг Вашингтондаги элчихонаси, шунингдек, Сидней, Торонто ва Париждаги консулликлари бўлган. Бундан ташқари, қишки Олимпия ўйинлари билан боғлиқ сайтлар ва объектлар, жумладан, Алп тоғларидаги Кортин-д'Ампеццо шаҳридаги меҳмонхоналар (у ерда тоғ чанғиси бўйича мусобақалар бўлиб ўтади) киберҳужумга учраган.

Антонио Таяни киберҳужумда “Россия изи” кўринаётганини айтди. Унинг қўшимча қилишича, буни ҳужум қилган гуруҳнинг ўзи ҳам баёноти орқали тасдиқлаган. Шунингдек, киберҳужум муваффақиятли тўхтатилган.

Киберҳужум учун жавобгарликни Россияга алоқадор NoName057 хакерлар гуруҳи ўз зиммасига олди. "Италия ҳукумати украиналик террорчиларни қўллаб-қувватлаётгани учун биз уларни DDoS ҳужумларимиз билан жазоладик", дейилган Гуруҳга тегишли Теlegram-каналда эълон қилинган баёнотда.