Россияда Путинни ҳимоя қилувчи видеокузатув камералари иши вақтинча тўхтатиб қўйилди

​Financial Times нашрига икки манбанинг хабар беришича, Россия хавфсизлик хизматлари Путин ва унинг энг яқин ёрдамчиларини ҳимоя қилувчи махсус видеокузатув тизимининг бир қисмини ўчириб қўйган. Бу воқеа Теҳронда Оятуллоҳ Али Хоминаий ўлдирилганидан кейин содир бўлган.

​Суҳбатдошлардан бирининг сўзларига кўра, ушбу тизим Москвада ўрнатилган қарийб 300 мингта камерадан алоҳида ишлайди. Интернетдан узилиб ва синчковлик билан текширувдан ўтказилгандан сўнг, Путинни ҳимоя қилувчи камералар қайта ёқилган.

​Бу чоралар Исроил разведкаси Хоманаий ва бошқа юқори мартабали шахсларни ўлдириш бўйича операцияни режалаштириш учун унинг қаерда эканлигини аниқлаш мақсадида Эрон йўл камераларидан катта ҳажмдаги видеоёзувларни йиғиб олганидан кейин кўрилди.

Россия Президентини​нг матбуот котиби Дмитрий Песков газетанинг камералар ўчирилгани ҳақидаги саволларига жавоб бермади, аммо бундан олдин Федерал хавфсизлик хизмати директори Александр Бортников минтақавий хавфсизлик хизматлари раҳбарларини Россиядаги "кенг қамровли кузатиш тизими заиф нуқтага айлангани" ҳақида огоҳлантирган эди.

"​Яқинда Америка-Исроил алянси томонидан Эрон олий раҳбарияти вакилларининг йўқ қилиниши аниқ хавфли сигналдир. Қурбонларнинг қаерда жойлашганлиги ҳақидаги координаталар, жумладан, Теҳрондаги видеомониторинг тизимларидаги дастурий "яширин кодлар" орқали олинган", — деган эди у.

​Россия томонидан кўрилган эҳтиёт чораларига қарамай, украиналик мустақил ҳакерлардан бири FT’га Москвадаги ва ҳатто Кремл атрофидаги камералар "ҳамон ишлаётгани ва мунтазам равишда бузиб кирилаётганини" айтди.
​
Янги технологиялар видео бўйича матнли қидирувдан фойдаланишга имкон беради.

Бундай қидирув разведка ходимларига "икки эркак бир-бирига сумка узатяпти" каби оддий сўровлардан фойдаланиш ёки, масалан, қисқа вақт ичида бир жойдан бир неча бор ўтиб кетган транспорт воситасини излаш имконини беради.

"​Бу видеокузатувнинг "Муқаддас Граал"идир (энг олий мақсадидир). Биз объектларни эмас, балки хулқ-атворни излашимиз мумкин, бу эса янги имкониятлар дунёсини очди",
— деди FT’га ушбу технологиядан фойдаланаётган европалик амалдор.