Ўзбекистоннинг Новосибирск шаҳридаги Бош консулхонаси ва Миграция агентлиги ваколатхонаси ходимлари кўмагида Россиянинг Тива Республикасида вақтинча ишлаётган тўрт нафар ўзбекистонлик ватанга қайтарилган. Бу ҳақда "Дунё" ахборот агентлиги хабар бермоқда.
Маълум қилинишича, ўзбекистонликлар яшаб келган жойда содир бўлган кучли ёнғин оқибатида уларнинг ҳужжатлари, шу жумладан, паспортлари йўқолган.
Дипломатлар томонидан тўрт нафар юртдошимизнинг Ўзбекистонга қайтиши учун гувоҳнома ва бошқа зарур ҳужжатлар тезкорлик билан расмийлаштирилган.
Миграция агентлиги ваколатхонаси томонидан эса "Новосибирск-Тошкент" йўналиши парвоз қиладиган самолётга чипта харид қилинган. Улар шу 2025 йил 25 январ куни Тошкентга кузатиб қўйилган.
