Россия болаларни ўлдираётгани ҳақида жим турмаслик керак — Зеленский

"РФ болаларни баллистик қуроллар билан ўлдираётганини яшириш нотўғри ва хавфли. Бу Москвадаги разилларга урушни давом эттириш ва дипломатияни эътиборсиз қолдириш каби ишларини рағбатлантиради", — дейди Зеленский 5 апрел куни кечқурун Кривой Рогга берилган зарбани шарҳлаш чоғида.

Россиянинг ракета ва дронлар ҳужуми оқибатида 18 киши, жумладан тўққиз нафар бола ҳалок бўлди. Днепропетровск вилояти ҳарбий бошқармаси раҳбари Сергей Лисакнинг маълум қилишича, жабрланганлар сони 74 кишига етди. Уларнинг 37 нафари, шу жумладан беш нафар бола шифохоналарда даволанмоқда. Кейинроқ яна бир киши айни ҳудудга уюштирилган дрон ҳужумидан ҳалок бўлди.

Ўша куни президент Зеленский шифохонада 3 ёшли бола вафот этгани ҳақидаги хабарни ижтимоий тармоқларга жойлаштирган эди. У ҳалок бўлган болаларнинг исмларини санаб ўтди ва турли давлатлар, жумладан, Германия вакилларига "принципиал позицияси учун" миннатдорчилик билдирди, аммо АҚШ элчихонасининг муносабати "ҳайратда қолдираётганини" таъкидлади. "Шунчалик кучли мамлакат ва халқ ушбу ҳолатларга шу даражада совуқ муносабатда бўлаётганини кўриб ҳайрон қоляпмиз. Болаларни ўлдирган ракета ҳақида гапирганда ҳатто "Россия" сўзини ишлатишдан қўрқишяпти", — деб ёзади Украина президенти.

Қўшма Штатларнинг Украинадаги элчиси Бриджит Бринк Х ижтимоий тармоғида Кривой Рогдаги болалар майдончаси ва ресторан яқинига ракета қулагани "даҳшатли" эканини ёзди, бироқ ракета кимга тегишли эканлиги ҳақида лом-мим демади. "Шу сабаб ҳам бу урушга тезроқ якун ясаш лозим", дея қўшимча қилди у.

Hromadske нашрининг аниқлаштиришича, аввалги шунга ўхшаш хабарларда Бринк россияликларнинг алоқадорлигига ишора қилган эди. Нашр бунга дипломатнинг бошқа постларини мисол қилиб келтирган.