Россия банки нефт нархларининг кескин тушиши мамлакат иқтисодиёти учун ҳалокатли оқибатларга олиб келиши мумкинлигидан огоҳлантирди

Бу ҳақида Reuters хабар берди.

Агентиликка кўра, бу огоҳлантириш АҚШ президенти Доналд Трамп ва Россия президенти Владимир Путин Украинадаги урушни тўхтатиш бўйича музокараларни бошлашидан бир неча ҳафта аввал қилинган. Трамп Россияга қарши янада кучли санкциялар жорий этилишини айтган ва Қўшма Штатларда нефт қазиб олишни ошириш ниятида эканини билдирган. Бундан ташқари, у Саудия Арабистонини ҳам кўпроқ нефт қазиб чиқаришга ундашни режалаштирмоқда.

"Россия Марказий банки ҳар йили ҳукумат учун тайёрланувчи ёпиқ ҳисоботларида иқтисодий хавфларни таҳлил қилади, лекин бу сафар илк марта 1980-йиллардагига ўхшаш узоқ муддатли нефт нархларининг пасайиши мумкинлигини таъкидлаган. Ўша даврдаги инқироз Совет иттифоқининг парчаланишига олиб келган эди. Марказий банк АҚШ ва ОPEC нефт бозорига қандай таъсир ўтказиши мумкинлиги ҳақида аниқ сценарий келтирмаган, аммо нефт нархининг узоқ муддат ва кескин пасайиши Россия иқтисодиёти учун асосий хатарлардан бири сифатида қайд этилган", деб ёзади Reuters.