Роналду ва Жоржина никоҳ шартномаси имзолади

“Ан-Насср” клуби ва Португалия терма жамоаси ҳужумчиси Криштиану Роналду ҳамда унинг севгилиси Жоржина Родригес ўртасида расмий никоҳ шартномаси имзоланди. Бу ҳақда Маrcа нашри хабар бермоқда.

Манбага кўра, мазкур ҳужжат катта молиявий мажбуриятларни ўз ичига олади. Агар жуфтлик ажрашадиган бўлса, Роналду юз миллионлаб доллар сарфлашига тўғри келиши мумкин. Шартномада нафақат ҳар ойлик тўловлар, балки бир марталик йирик суммалар ва катта миқдордаги бонуслар ҳам белгиланган.

Шартноманинг асосий бандлари қуйидагича:

1. Жоржинага ҳар ойда 114 минг АҚШ доллари миқдорида тўлов амалга оширилади;
2. 5,6 миллион долларгача бўлган қийматдаги кўчмас мулкка эгалик ҳуқуқи берилади;
3. Ажрашиш ҳолатида Жоржинага ҳар ойда 110 минг доллар миқдорида “пенсия” тўланади;
4. Фарзандлар учун ҳар ойда 500 минг доллар миқдорида алимент ажратилади;
5. Қўшимча бонус сифатида йилига 2 миллион доллар, икки дона қимматбаҳо автомобил ҳамда авиапарвозлар билан боғлиқ имтиёзлар тақдим этилади;
6. Ажрашиш юз берган тақдирда, 50 миллион доллар миқдоридаги бир марталик тўлов амалга оширилади.

Forbes нашри ҳисоб-китобларига кўра, Криштиану Роналдунинг бойлиги тахминан 671 миллион доллар деб баҳоланмоқда. У ушбу шартномани имзолаш орқали нафақат ўз молиявий активларини ҳимоя қилиш, балки Жоржина Родригес ва фарзандларининг келажагини ҳам кафолатлашни мақсад қилган.