Renault Украинада дронлар ишлаб чиқаришни бошлайди

Бу ҳақда Reuters хабар бермоқда

Franceinfo радиосининг хабар беришича, автомобил ишлаб чиқарувчи компания Украина ҳудудида фронтдан "бир неча ўн ёки юз километр масофада" ҳарбий разведка дронларини ишлаб чиқаришни йўлга қўяди ва бу ишларни "ҳимоя соҳасига ихтисослашган Франциянинг кичик ва ўрта корхоналари" билан ҳамкорликда амалга оширади.

Renault компанияси Франция Мудофаа вазирлиги уларга "дронларни ишлаб чиқариш имконияти тўғрисида мурожаат қилганини" тасдиқлади. Бироқ, компания раҳбарияти ҳали қарор қабул қилинмаганини ва ушбу лойиҳа бўйича қўшимча маълумотларни кутиб турганини маълум қилди.

Аввалроқ Франция мудофаа вазири Себастьян Лекорню номи айтилмаган бир француз автомобилсоз компанияси Украинада дронларни ишлаб чиқаришни бошлашини, ушбу қўшма корхона маҳсулотларининг бир қисми Украина Қуролли кучларига, қолган қисми эса Франция армиясига етказиб берилишини айтган эди.