Украина Олий Радаси депутати Елизавета Ясько Грузиянинг собиқ президенти Михаил Саакашвилига қарши Украина судига даъво аризаси киритди. У Саакашвилини уларнинг умумий қизи Жасминга нисбатан ота-оналик ҳуқуқидан маҳрум қилишни, шунингдек, фарзанди вояга етгунига қадар алимент тўлашни талаб қилмоқда.
Бу ҳақда Украинанинг «Обозреватель» нашри суд реестри маълумотлари ва Киевдаги Шевченко туман суди сайтига таяниб маълум қилган.
Ўз навбатида, ҳозирда Грузия қамоғида жазо ўтаётган Саакашвили X ижтимоий тармоғида Ясько у қамоққа тушганидан кейин дунёга келган қизи Жасминга моддий ёрдам кўрсатиб келаётганини ёзган.
Саакашвилининг айтишича, унинг онаси Киевда ва Европанинг бир қатор шаҳарларида набираси билан учрашган. Собиқ президентнинг таъкидлашича, онаси Жасминга ҳар ой молиявий ёрдам бериб келмоқда, шунингдек, 2022 йилда унга Киевдан квартира совға қилган.
Саакашвили 2013 йилда Грузияни тарк этган, шундан сўнг унга нисбатан мамлакатда жиноий ишлар қўзғатилган. 2015 йилда у Украина фуқаролигини олган ва 2015–2016 йилларда Одесса вилояти губернатори лавозимида ишлаган. Кейинчалик Миллий ислоҳотлар кенгаши раҳбари этиб тайинланган.
2021 йил октябрь ойида Саакашвили яширин равишда Грузияга қайтган, бироқ қўлга олинган. Грузияда собиқ президент давлат маблағларини ўзлаштириш, депутатни калтаклашни ташкил этиш, мансаб ваколатларини суиистеъмол қилиш ва давлат чегарасини ноқонуний кесиб ўтиш айбловлари бўйича озодликдан маҳрум этилган.
Саакашвилининг жами тўрт нафар фарзанди бор: собиқ рафиқаси, Нидерландия фуқароси Сандра Рулофсдан икки ўғил, грузин қўшиқчиси Софо Нижарадзе билан муносабатидан бир қиз ва Елизавета Яськодан бир қиз.
Зеленский Украина ҳудудининг бир қисмидан воз кечишга олиб келадиган тинчлик келишувига рози бўлиши мумкин
Сунъий интеллект дунёдаги энг қиммат сурат муаллифлигини шубҳа остига қўйди
Ўзбекистон Самарқанд ҳақидаги баёнотлар сабаб Эронга норозилик нотаси топширди
