Ўзбекистон ва Туркия ўртасидаги иқтисодий ҳамкорлик тобора мустаҳкамланиб, қурилиш материаллари саноатидаги алоқалар янги босқичга чиқмоқда. Икки давлатнинг миллий қадриятлари ва урф-одатларининг ўхшашлиги, шунингдек, Туркиянинг қурилиш саноатидаги илғор тажрибаси ҳамкорликни янада кенгайтириш учун муҳим омил бўлиб хизмат қилмоқда.
2025 йил 20 март куни IMSAD – Туркиянинг Қурилиш материаллари ишлаб чиқарувчилар уюшмаси билан “Ўзсаноатқурилишбанк” АТБ ва “Ўзсаноатқурилишматериаллари” уюшмаси раҳбарияти ўртасида икки томонлама ҳамкорликни ривожлантириш юзасидан учрашув бўлиб ўтди.
Учрашув давомида IMSAD ва “Ўзсаноатқурилишбанк” ўртасида жами тўққизта стратегик йўналиш бўйича босқичма-босқич амалга ошириладиган ҳамкорлик режаси тасдиқланди. Жумладан:
— Илмий ишланмаларни тижоратлаштириш ва соҳадаги тадқиқот муассасалари ўртасида ҳамкорликни кучайтириш;
— Хомашё сифати ва қурилиш материаллари стандартларини ошириш, миллий нормаларни Туркия тажрибаси асосида модернизатсия қилиш;
— Саноат чиқиндиларини утилизатсия қилиш ва қайта фойдаланиш механизмларини ишлаб чиқиш;
— Янги инвестиция лойиҳаларини амалга ошириш ва хорижий брендларни жалб этиш масалалари муҳокама қилинди.
Шунингдек, 2024 йилда Ўзбекистон ва Туркия ўртасида қурилиш материаллари соҳасидаги товар айирбошлаш ҳажми 64,5 миллион АҚШ долларини ташкил этгани қайд этилди. Келгусида талаб қопланмаган қурилиш материалларини ишлаб чиқаришни ривожлантириш мақсадида икки мамлакат ишлаб чиқарувчилари ўртасида бизнес-форумлар ташкил этишга келишиб олинди.
Маълумот учун: Туркиянинг Қурилиш материаллари ишлаб чиқарувчилар уюшмаси – IMSAD 1984 йилда ташкил этилган бўлиб, у 85 та йирик компания, 60 та уюшма, 1 та касаба уюшмаси ва 5 та университетни ўз ичига олади. Уларнинг жами ишлаб чиқариш ҳажми 120 миллиард АҚШ долларини ташкил этади.
