Қозоғистон Республикасидаги “Қозоқипаксаноат” бирлашмаси раҳбари Султон Бакиров бошчилигида Туркистон вилояти туманлари ҳокимлари ва бир гуруҳ тадбиркорлардан иборат делегация Андижон вилояти Марҳамат туманидаги “Ипак кўчат” тутчилик кластерида бўлди.
Меҳмонлар тутчилик ва ипакчиликдаги “ўзбек модели”ни, тажрибасини Қозоғистонда жорий этиш, ҳамкорликда тут плантацияларини ташкил этиш, ҳамда ҳозирги кунга келиб йўқолиб кетиш арафасида турган ипак қурти боқиш анъанасини қайта тиклаш мақсадида ташриф буюрди. “Ўзбекипаксаноат” уюшмаси билан келажакда ҳамкорлик масалаларини кўриб чиқиш, ипак қурти боқишнинг замонавий усулларини жорий қилишда мутахассислар гуруҳини жалб этиш каби масалалар кўриб чиқилди.
– Бугунги кунда бизда мавжуд тутзорлар маънан эскирган, ипак қурти боқиш учун яроқсиз ҳолда, – дейди “Қозоқипаксаноат” бирлашмаси раҳбари Султон Бакиров. – “Марҳамат-2017” навли тутни Ўзбекистондан сотиб олиб, қозоқ далаларида тутчилик кластерларини ташкил қилиш ниятидаман. Бунга шахсан Туркистон вилояти губернатори розилик билдирган. Мақсад сизлардаги тажрибани ўзимизда жорий этиш орқали маҳаллий аҳоли бандлигини таъминлаш ва уларга даромад манбаига эга бўлган касбни ўргатишдан иборат.
