Қозоғистонда Каспий қирғоғида 100 дан ортиқ ўлик тюлень топилди

Каспий денгизи қирғоғида Қозоғистоннинг Манғистау вилоятидаги Форт-Шевченко шаҳри яқинида 117 та тюлень жасади топилди.

Бу ҳақда Қишлоқ хўжалиги вазирлиги Балиқ хўжалиги қўмитаси хабар берди.

"Урал-Каспий балиқчилик инспекцияси рейд давомида кучли парчаланган 117 та тюлень танасини топди. Жониворлар Тўпқорағон туманининг Форт-Шевченко шаҳридаги "Асан," "Мис Баутин," "Мис Урдюк" ҳудудларидан топилган. Жасадларнинг парчаланишига кўра, топилган тюленлар ўтган йилнинг ноябрь-декабрь ойларида нобуд бўлган," - дейилади хабарда.

Қайд этилишича, тегишли орган ходимлари томонидан денгиз қирғоғидан 5 км узоқликда ётган нерпа жасадлари йиғиб олиниб, санитария меъёрларига риоя қилган ҳолда полигонда йўқ қилинган.

2024 йил ноябрь ойидан бери топилган ўлик тюленларнинг умумий сони 2194 тага етди, дея таъкидлади Балиқ хўжалиги қўмитаси.