Нур-Султон ва Чимкент шаҳарларида газ нархи ошишини тўхтатишни талаб қилган намойишчилар қўлга олинди. Бу ҳақда Озодлик радиоси хабар берди.
Қайд этилишича, 4 январь, сешанба куни Қозоғистон полицияси пойтахтда шаҳар маъмурияти яқинида намойишга чиққан камида уч кишини қўлга олган. Журналистларнинг сўзларига кўра, намойишчилар Жанаўзен шаҳридаги худди шундай “газ” намойишларини қўллаб-қувватлаган ва шу билан бирга, уй-жой масаласини ҳал қилишни талаб қилган. Айни вақтда акция иштирокчиларидан бири “Шал, кет!” деб ҳайқирган (“Чол, кет!”). Бу Қозоғистоннинг биринчи президенти Нурсултон Назарбоевнинг сиёсатдан истеъфосини талаб қилишдир.
Чимкентда хавфсизлик хизмати ходимлари маҳаллий маъмурият биноси олдидаги митингга чиққан ўндан ортиқ одамни қўлга олди. Намойишчилар бошқа шаҳарлардаги “газ” намойишлари иштирокчилари билан бирдамлик билдириб, иш ҳақини оширишни талаб қилишди. Қўлга олиш чоғида улар ҳам “Назарбоев, кет!” деб бақиришган.
Бундан ташқари, шу куни Олмаотада Республика майдони тўсиб қўйилган, мобил интернет ҳам чекланган эди. Нур-Султондаги пойтахт маъмурияти ҳудудида ҳам унга кириш тўхтатилган.
2 январь куни Қозоғистоннинг Манғистау вилоятида одамлар автомобиллар учун бензин нархи ошишига қарши норозилик акциясига чиқишди. Улар суюлтирилган ёқилғи нархининг бир литри 60 тенгедан 120 тенгега кескин кўтарилганидан норози бўлиб, арзонлаштиришни талаб қилишди. Кейинроқ полиция митингларни тарқатишга урингани ва уларнинг иштирокчиларига нисбатан куч ишлатгани маълум бўлди.
