Қора денгиз Россиянинг “соя флоти”га тегишли икки танкери портлаб кетди

Туркия қирғоқлари яқинида Россиянинг “соя флоти”га тегишли икки танкернинг портлаши Украина Хавфсизлик хизматининг махсус амалиёти натижасидир, деб хабар бермоқда “РБК-Украина”.

Нашрнинг аноним манбасига кўра, Украина Хавфсизлик хизмати (СБУ) Sea Baby денгиз дронлари ёрдамида Қора денгизда Kairos ва Virat нефт танкерларига ҳужум қилган.

Россия нефтини ташиганлик учун санкциялар остида бўлган бу икки танкер Туркия қирғоқлари яқинида деярли бир вақтнинг ўзида юз берган портлашлардан зарар кўрган. Туркия расмийлари бу ҳодисанинг эҳтимолий сабаби сифатида “ташқи аралашув”ни тилга олган. Қайд этилишича, Virat танкерига икки марта зарба берилган.

Маълумотларга кўра, ҳужум пайтида кемалар бўш бўлган, улар юк ортиш учун Россиянинг Новороссийск портига кетаётганди. Эндиликда улар деярли бутунлай ишдан чиққан.