Қирғизистон ҳукумати коррупция ҳолатлари бўйича суриштирув ўтказувчи учта ОАВни “экстремистик ташкилот” деб эълон қилди

Қирғизистон ҳукумати коррупция ҳолатлари бўйича суриштирув ўтказувчи учта ОАВни “экстремистик ташкилот” деб эълон қилди — BBC.

Бишкек суди “Клооп” нашрини ҳамда Теmirov Live ва “Айт Айт Десе” номли YouTube-каналларини “экстремистик ташкилотлар” деб топди ва журналистларга интернетда ушбу манбаларнинг материалларини жойлаштиришни тақиқлади. Бу ҳақда Бишкекнинг Октябр тумани суди матбуот хизмати хабар берди.

Шунингдек, “Клооп” ва Temirov Live асосчиларининг фаолияти ҳам экстремистик деб топилган. “Клооп” нашрининг асосчиси Ринат Тухватшин, Temirov Live ва “Айт Айт Десе” каналларининг асосчиси эса Болот Темиров ҳисобланади.

Суд қарорининг бажарилишини Қирғизистон Рақамли ривожланиш ва инновацион технологиялар вазирлиги ҳузуридаги алоқа соҳасини тартибга солиш ва назорат қилиш хизмати ижро этиши белгиланган.

“Клооп” ва Temirov Live мамлакатдан ноқонуний равишда пул чиқариш, коррупция ва Россия компанияларининг Қирғизистон фирмалари орқали санкцияларни четлаб ўтиш схемалари бўйича олиб борган журналистик суриштирувлари билан танилган эди.

Ҳар икки нашр ходимларига “оммавий тартибсизликларга даъват қилиш” айблови қўйилган. Тўрт нафар журналист олти йилгача озодликдан маҳрум этилган, яна тўрт нафари эса уч йиллик синов муддати билан жазоланган", дея ёзмоқда BBC.