"Қамчиқ" довонида хандаққа тушиб кетган автомашина олиб чиқилди

ФВВ қутқарувчилари томонидан "Қамчиқ" довонида хандаққа тушиб кетган автомашина олиб чиқилди.

Бугун, 16-июн куни соат 08:57 да А-373 "Тошкент-Ўш" автомобил йўлининг "Қамчиқ" довонидан ўтган қисмида "Водий-Тошкент" йўналишида ҳаракатланган "Матиз" русумли автомобил ҳайдовчиси бошқарувни йўқотиши оқибатида йўлнинг хандақ (кювет) қисмига тушиб кетганлиги ва амалий ёрдам зарурлиги тўғрисида "Қамчиқ" махсус-қидирув ёнғин-қутқарув бошқармасига хабар келиб тушган.

Хабарга асосан, қутқарув отряди айтилган манзилга зудлик билан етиб бориб, махсус техника ва асбоб-анжомлар ёрдамида автомобил хандақдан олиб чиқилган.

Автомобилда ҳайдовчи ва 2 нафар йўловчи бўлган. Ҳодиса оқибатида тан-жароҳати олганлар йўқ.