Путин Зеленский ва Трамп билан шахсий учрашув ўтказишга қарши эмас

Россия президенти Владимир Путин Украина президенти Владимир Зеленский ва АҚШ президенти Дональд Трамп билан шахсий учрашувига принципиал жиҳатдан қарши эмас.

Бу ҳақда Россия давлат раҳбари матбуот котиби Дмитрий Песков маълум қилди.

Унинг сўзларига кўра, Россия ва Украина делегациялари ўртасидаги музокараларда аниқ натижаларга эришилгандан кейингина олий даражадаги алоқалар имкониятини кўриб чиқиш мумкин.

"Президент Путин принципиал жиҳатдан олий даражадаги алоқалар "тарафдори" эканини бир неча бор таъкидлаган. Албатта, бундай учрашувлар талабга эга. Лекин уларга олдиндан тайёргарлик кўриш керак. Биринчидан, икки давлат делегациялари ўртасидаги тўғридан-тўғри музокараларда натижага эришиш керак. Шундан кейингина олий даражадаги учрашувлар ҳақида гапириш мумкин", — деди Песков.

Кремль Туркия ташқи ишлар вазири Хоқон Фиданнинг яқинда Анқара Россия, Украина ва АҚШ президентларини музокаралар учун қабул қилишга тайёрлиги ҳақидаги баёнотини шундай изоҳлади. Аввалроқ Туркия томони ҳам тинчлик ташаббуслари ва дипломатик воситачиликни давом эттиришдан манфаатдор эканини тасдиқлаган эди.