Путин ядровий қурол ишлатишдан қўрқади,- Зеленский

Украина президенти Россиянинг ядро қуролидан фойдаланиш эҳтимоли ҳақидаги баёнотларига жавоб қайтарди. Владимир Зеленский Fox News телеканалига берган интервьюсида таъкидлаганидек, Путин исталган вақтда ва исталган давлатга зарба бериши мумкин, бироқ унинг фикрича, бу қадамни ташлаши даргумон.

«У ҳар доим ҳам адекват эмас, чунки ҳеч бир адекват одам Украинага келиб, ўзи қилган ишни қила олмайди. Менимча, у ўз ҳаётини ва бошқаларнинг ҳаётини назорат қилишни яхши кўради. Шунинг учун, менимча, у ядро қуролини қўллашдан қўрқиши керак”, деди Зеленский.

Бир неча кун олдин Россия президенти Россиянинг ядровий чеклаш доктринасига ўзгартириш киритишни таклиф қилган эди. Хусусан, у »ҳар қандай ядровий бўлмаган давлат томонидан, лекин ядровий давлат иштироки ёки қўллаб-қувватлаши билан Россияга қарши тажовузни "Россия Федерациясига "қўшма" ҳужум деб ҳисобламоқчи. Путиннинг матбуот котиби Дмитрий Песковнинг сўзларига кўра, Россия Мудофаа вазирлиги ядро қуролидан фойдаланиш шартларини белгилайди.