Путин Трамп билан телефон орқали суҳбатлашди

Бу ҳақда Россия президенти ёрдамчиси Юрий Ушаков маълум қилди.

Ушаковнинг қайд этишича, суҳбат тахминан 50 дақиқа давом этган ва “ҳар икки томон учун фойдали” бўлган.

"Трамп Исроил ва Эрон атрофидаги вазиятни “жуда ташвишли” деб атади. Бунга жавобан Путин Россиянинг ушбу мамлакатлар ўртасидаги музокараларга воситачилик қилишга тайёрлигини билдирди. Бундан ташқари, иккала президент ҳам Эроннинг ядровий дастури бўйича музокараларга қайтиш эҳтимолини инкор этмади", — деди Россия президенти ёрдамчиси.

Ушаковнинг билдиршича, суҳбат давомида Путин 22 июндан кейин Украина билан музокараларни давом эттиришга тайёрлигини ҳам тасдиқлаган.

"Шунингдек, Владимир Путин Доналд Трампни туғилган куни билан табриклади. Ҳар икки президент шахсий муносабатларининг ижобий ҳолатда эканидан мамнунлигини билдирди", — дея қўшимча қилди Ушаков.

Маълумот учун, бугун Қўшма Штатларнинг амалдаги президенти Доналд Трампнинг туғилган куни, сиёсатчи бугун 79 ёшга тўлади.