Польша ва Балтика давлатлари Меркелни Путинни оқлаётганликда айблади

Германиянинг собиқ канцлери Ангела Меркелнинг Россия билан музокаралар барбод бўлишида Польша ва Балтика давлатларини айбловчи баёнотлари Шарқий Европада қаттиқ норозилик тўлқинини келтириб чиқарди. Partizan нашрига берган интервьюсида Меркель 2021 йили Владимир Путин билан янги мулоқот бошлашни истаганини, аммо Варшава ва Балтика пойтахтлари бунга тўсқинлик қилганини айтди.

«Кейин мен лавозимни тарк этдим ва Путиннинг тажовузи бошланди», — деди у.

Польшанинг собиқ бош вазири Матеуш Моравецкий Меркелга жавобан уни кескин танқид қилди. Унга кўра, айнан Меркелнинг «Шимолий оқим» лойиҳасини қўллаб-қувватлаши Европанинг Россияга боғлиқлигини кучайтирган. У Меркелни “Германиянинг замонавий тарихидаги энг зарарли сиёсатчилардан бири” деб атади.

Унинг партиядоши Адам Белян эса:

«Унинг қўлларида қон бор, унга жим бўлгани маъқул», — деди.

Кескин танқидлар Балтика давлатларидан ҳам янгради. Латвиянинг собиқ мудофаа вазири Артис Пабрикс Меркелни «Кремл таъсир агентидек эшитилади», дея таърифлади. Эстония ташқи ишлар вазири Маргус Цахкна таъкидлашича, уруш учун жавобгарлик фақатгина Россия зиммасида. Эстония парламенти депутати Марко Михкельсон эса Меркел сўзларини «унинг сиёсий меросидаги янги пастлик» деб атади.