Пезешкиан АҚШ ва Исроилни қўрқитди

АҚШ ва Исроил Эронга зарба беришга журъат этса, Эрон юз баробар кўпроқ ядро объектлари қуради.

Бу ҳақда Ислом Республикаси президенти Масъуд Пезешкиан Бушер вилоятига қилган ташрифи пайтида маълум қилди.

"Улар (АҚШ ва Исроил) ядро марказларимизга зарба бериш билан таҳдид қилмоқда. Улар биноларга зарба беришлари мумкин, лекин уларни бунёд этаётган ақл-идрокка зарба бера олмайди. Юзта марказга зарба беришсин, минглаб шундай марказлар қайтадан қурилади," - деди Эрон президенти.

Бундан олдин The Wall Street Journal газетаси АҚШ разведка агентликларининг маълумотларига кўра, Исроил Теҳроннинг заифлигидан фойдаланиш мақсадида 2025 йилда Эроннинг ядро объектларига кенг кўламли зарбалар бериш имкониятини кўриб чиқаётгани ҳақида хабар берган эди.