Одил Аҳмедовнинг илк профессионал клуби Тошкентнинг «Пахтакор» жамоаси ўз вақтида футболчи тўп сурган 25-рақамли либосини абадий унга атади.
Ёзда миллий жамоадаги фаолиятини якунлаган Одил Аҳмедов, бугун 18 декабрь куни футболчилик фаолиятини тугатганини расман эълон қилди. Бу ҳақда футболчининг ўзи унинг фаолиятига бағишланган «Одил Aҳмедов: «Орзунинг шонли йўли» китоби тақдимот маросимида маълум қилди.
Тадбир давомида «Пахтакор» клуби раҳбарияти Одил Аҳмедовнинг ҳурмати учун жамоанинг 25-рақамини унга абадий топширилишини маълум қилди. Аҳмедов 2006-2010 йиллар давомида «Пахтакор» сафида тўп суриб, 2011 йил «Анжи»га трансфер қилинганди.
Эслатиб ўтамиз, Одил Аҳмедов 2007 йилдан 2021 йилнинг ёзигача бош жамоамиз сафида тўп суриб, Ўзбекистон ЖЧ-2022 учинчи саралаш босқичига чиқа олмаганидан сўнг миллий жамоадаги фаолиятини якунлаган эди. 34 ёшли яримҳимоячи Хитой Суперлигаси жорий мавсумида «Цанчжоу Майти Лайонс» сафида 7 ўйинда майдонга тушганди. У фаолияти давомида «Пахтакор», «Анжи», «Краснодар», «Шанхай СИПГ» клубларида ҳам тўп сурди.
