Паузалар, унутилган саналар ва ҳазиллар: Байденнинг сўроқ қилиниш аудиоёзуви эълон қилинди

Axios портали Жо Байденнинг махфий ҳужжатларни нотўғри сақлаш иши бўйича сўроқ қилинишининг беш соатлик аудиоёзувини эълон қилди.

Ёзувда АҚШнинг собиқ президенти собиқ махсус прокурор Роберт Хёр билан суҳбатда тўхтаб қолгани, саналарни чалкаштирган, мавзудан-мавзуга сакрагани, хусусан, ҳужжатлар ҳақидаги саволга жавобан Мўғулистонга қилган сафари ҳақида гапиргани акс этган. У, шунингдек, махфий материалларни "шунчаки келажак авлодлар учун" сақламоқчи бўлганини ҳам тан олган.

Суҳбат бошида Байден "Мен ёш йигитман," деб ҳазиллашган. Бироқ, сўроқ давомида у бир неча бор хотираси билан боғлиқ муаммоларга дуч келган - витсе-президентлик даври ва ўғлининг вафот этган саналарини эслай олмаган.

Илгари Оқ уй бу ёзувни эълон қилишдан бош тортиб, бу кейинги текширувларга тўсқинлик қилиши мумкинлигини таъкидлаган эди. Стенограмма аввалроқ эълон қилинган бўлса-да, аудио ёзув воқеага ҳиссий тус берди.