Париж театри биноларини қочқинлар эгаллаб олгани сабабли ёпилиш арафасида

Париждаги La Gaîté Lyrique театри 300 га яқин муҳожирлар гуруҳи биносини эгаллаб олганидан сўнг банкрот бўлиш арафасида. Ҳаммаси 10 декабр куни театр “Францияда қочқинларни қабул қилиш масаласини қайта кўриб чиқиш” деб номланган тадбир ўтказгач, мигрантларни текинга таклиф қилганидан бошланди. Энди, деярли олти ҳафта ўтгач, қочқинлар бинода қолиб, театр фаолиятини тўсиб қўйишмоқда.

Шу муносабат билан барча спектаклларни кейинга қолдириш, бекор қилиш ёки бошқа театрларда ўтказиш керак эди. Бу юз минглаб евролик молиявий йўқотишларга олиб келди. Маъмурият таъкидлаганидек, театрнинг атиги 30 фоизи давлат томонидан молиялаштирилади, қолган 70 фоизини эса мустақил равишда ишлаб чиқиши керак.

“Бинонинг эгаллаб олингани ҳамда Париж ва префектура маъмурияти томонидан ечим топилмагани сабабли, La Gaîté Lyrique энди томошабинларни сиғдира олмайди”, дейилади театр сайтидаги баёнотда.

Бинода қолган муҳожирлар стул ва столларда ухлашади, овоз ёзиш студияси эса тиббиёт марказига айлантирилган. Театр маъмурияти бинодаги санитария шароити тез ёмонлашаётганини маълум қилди.

Театр биноларини эгаллаб олган қочқинлар “муносиб ва ​​доимий уй-жой” талаб қилмоқда. Театр раҳбарияти бинонинг эгаллаб олиниши улар учун “тўсатдан ва ҳалокатли зарба” бўлганини таъкидлаб, шаҳар ва давлат идораларидан тезкор ёрдамга умид қилмоқда.