Олма-ота вилоятида яшовчи аёл тез тиббий ёрдам шифокорини ўз қизи етти ёшли Василина Бражникованинг ўлимида айбламоқда. Онанинг сўзларига кўра, шифокор қизга 12 ёшгача бўлган болаларга тақиқланган дориларни буюрган, деб хабар беради tengrinews.kz.
Дори-дармонларни қабул қилиб бўлгач, мактаб ўқувчиси комага тушиб қолган. Икки кундан кейин у интенсив терапияда вафот этди. Бу воқеа КТК телеканалининг хабарларида айтилган. Василина катта оилада энг сўнгги фарзанд эди. Қизнинг онаси айтишича, беш фарзандининг ичида у энг қувноқ қиз бўлган. Ҳеч қачон соғлигидан шикоят қилмаган. "У бутунлай соғлом эди, қишда битта футболка кийиб олиб ўйнаб-кулиб юрарди. У эгнига битта кофтани илиб, кўчадаги ҳожатхонага югурарди", дейди Эвгения Игнатиева.
Икки ой олдин Василина мактабдан келиб, қорин оғриғидан шикоят қилади. Эртаси куни боланинг ҳарорати кўтарилди. Улар тез ёрдам чақиришган. Шифокор дори-дармон буюрган, шу дорилар сабабли онанинг сўзларига кўра, қиз янада оғирлашиб қолган ва комага тушган. "Мана шундай ёзилган: Тайлолфен хот, парацетамол ва антигриппин. Бунга мутлақо шифокорлар айбдор. Айниқса ўша фельдшер. Бу дори 13 ёшдан катталарга берилади. Бу дражаларда сақланадиган паратсетамол миқдори билан бола шунчаки тамом бўлган" - дейди марҳума қизнинг онаси ғазабланиб.
Қизча оғир аҳволда олиб келинган касалхонада парацетамол миқдорини ҳаддан ташқари ошириб юбориш туфайли ўлим содир бўлганлиги тасдиқланди. "Уйда она даволашни бошлаб юборган. У бир неча марта парацетамол таблеткасини берган. Аммо шундан кейин боланинг аҳволи яхшиланмади. Шундан сўнг, ота-она Бурундай қишлоғидаги касалхонага мурожаат қилишди. Биз дастлабки ташхисни қўйдик: Рей синдроми. Кўп миқдорда парацетамол берилганида баъзи болаларда, ҳатто айрим катта одамларда жигар шикастланиши кузатилади. Жигар ҳужайралари парчаланади ва улар барча токсинларни чиқариб юборадилар ", - деди Олмаота вилоят болалар клиник шифохонаси директорининг ўринбосари Асқар Калиев.
Уч кун давомида ҳушига келмаган Василина реанимацияда вафот этди. Шифокорларнинг сўзларига кўра, эрта ташхис қўйиш боланинг ҳаётини сақлаб қолиши мумкин эди. Бу орада тез тиббий ёрдам бригадасида келган туман касалхонаси шифокори бу воқеани биринчи марта эшитаётганини айтган. У ҳатто қўнғироқлар журналида бу ҳодисани қайд этмаган. "Бизнинг жамоамиз хизмат кўрсатган. Ҳозирча мен бу саволга жавоб бера олмайман, аввал буни аниқлаб олишимиз керак. Тез ёрдам фельдшерини чақирамиз, у ҳозирда таътилда", - дейди туман касалхонаси директори Дарига Содиқова.
Қизнинг онаси айбдорлар жазоланишига умид қилмоқда. Аёлнинг сўзларига кўра, у ҳеч қачон боласи парацетамол туфайли вафот этади деб ўйламаган. Аммо шифокорлар препаратнинг зарарли томонлари тўғрисида огоҳлантиришлари шарт эди.
