Озарбайжонда коронавирусга қарши вакцинанинг бустер дозаси билан қайта эмланган шахсларга муддатсиз эмланганлик гувоҳномаси берилади, дея хабар берилган Озарбайжон Республикаси Соғлиқни сақлаш вазирлиги ва Мажбурий тиббий суғурта давлат агентлиги ва ҳудудий тиббиёт бирликларини бошқариш уюшмаси қўшма баёнотида.
Ҳужжатга кўра, иммунизация CОVID-19 вирусининг янги ва тез тарқаладиган штаммлари асоратлари олдини олишнинг энг самарали усули ҳисобланади.
«Ҳозирда мамлакатда «Озарбайжон Республикасида 2021-2022 йилларга мўлжалланган CОVID-19 га қарши эмлаш стратегияси»га мувофиқ эмлаш жараёни ўтказилмоқда. Аҳолининг эмлашда фаол иштирок этиши натижасида мамлакатимизда эпидемиологик вазият барқарорлигича қолмоқда», — дейилади ҳужжатда.
Баёнотда, шунингдек, CОVID-19 вакцинасининг икки дозаси билан иммунизация қилинганидан кейин 5 ой ўтгач, организмга қараб, ушбу вирусга чидамлилик пасайиши мумкин. Шу муносабат билан организмнинг коронавирус инфекциясига қарши иммунитетини қайтадан ошириш учун «бустер доза»ни жорий этиш тавсия этилади.
Эслатиб ўтамиз, 15 февралдан бошлаб Озарбайжондаги спорт ва дам олиш масканлари, тўй-ҳашамлар, умумий овқатланиш корхоналари, меҳмонхоналар ва йирик савдо объектларига фақат амалдаги cовид-паспорт билан ташриф буюриш мумкин бўлади. Яъни, 6 ойдан кўпроқ вақт олдин иккинчи марта эмланган шахсларнинг CОVID-паспорти ўша кундан бошлаб ҳақиқий эмас деб ҳисобланади.
Шунингдек, Озарбайжонда CОVID-19 касаллигига чалинганлар 7 кундан кейин «иммунитет сертификати» олишлари мумкин. Ушбу ҳужжатдан фойдаланиш муддати 6 ойни ташкил этади, шундан сўнг сертификатнинг амал қилиш муддати вакцинанинг 1 дозасини олгандан кейин номаълум муддатга узайтирилади.
