Остонада ёққан қор сабаб 1 кунда 100 дан ортиқ ЙТҲ содир бўлди

Қозоғистоннинг Остонда шаҳрида 12 октябрь куни ёғган қор ортидан бир суткада 118 та йўл-транспорт ҳодисаси содир бўлди. Бу ҳақда “Орда.кз” хабар берди.

Маълум қилинишича, пойтахт йўлларидаги ЙТҲ оқибатида 12 киши жароҳатланган. Полиция департаменти ҳайдовчи ва пиёдаларни об-ҳаво шароити ёмонлашганда эҳтиёткор бўлишга чақирмоқда.

“Казгидромет” прогнозига кўра, циклон ва у билан боғлиқ фронтал бўлимлар Қозоғистон ҳудудининг катта қисмига ўз таъсирини сақлаб қолади. Жануб ва жануби-шарқда 13 октябрь куни момақалдироқ билан ёмғир ёғади. Шимолий ҳудудларда қор ёғиши, бўрон кузатилиши ва ер музлаши кутилмоқда. Мамлакатнинг ғарбида, аксинча, қуруқ об-ҳавони сақланиб қолади.

Қозоғистон бўйлаб шамол кучайиши, кечаси ва эрталаб туман тушиши кутилмоқда. Қизилўрда вилоятининг шимолий туманларида ҳарорат бир даражагача тушиши прогноз қилинган.

• Остонада ёғингарчилик кутилмайди, ҳарорат кечаси 6-8 даража, кундузи 1-3 даража совуқ бўлади.
• Олмаотада вақти-вақти билан ёмғир ёғади, ҳарорат кечаси 8-10 даража, кундузи 14-16 даража илиқ бўлади.
• Чимкентда ёмғир ёғади, ҳарорат кечаси 10-12 даража, кундузи 16-18 даража илиқ бўлади.