Оқ уй сайтида фейк янгиликлар тарқатадиган ОАВ рўйхати келтирилган янги бўлим пайдо бўлди

Сайтда “Ҳафта медиа-қоидабузарлари” сифатида Boston Globe, CBS News ва The Independent кўрсатилган. Уларга президент Доналд Трампнинг баёнотларини “нотўғри талқин қилганлик” айблови қўйилган.

Қайд этилишича, демократлар ва фейк янгилик тарқатувчилар “президент Трамп ҳарбийларга ноқонуний буйруқлар берган” деган фикрни илгари сурган.

Бўлимда шунингдек “Шармандалик зали” ҳам бор, у ерга The Washington Post, CBS News, CNN ва MSNBC киритилган. Ҳозирги рейтингда The Washington Post етакчи, иккинчи ва учинчи ўринларда эса MSNBC ҳамда CBS News турибди.

Кенгайтирилган рўйхатга Associated Press, Тhe New York Times, The Wall Street Journal, Axios ва Politico ҳам киритилган. Оқ уй уларни “тарафкашлик ва дезинформация” тарқатишда айбламоқда.

Ушбу бўлимнинг ишга туширилиши Доналд Трамп ва уни маъмуриятининг оммавий ахборот воситалари билан узоқ вақтдан бери давом этиб келаётган зиддиятининг янги босқичи бўлди. Аввалроқ Трамп The Wall Street Journal ва The New York Times'га нисбатан судга даъволар киритган, ABC News ва CBS News билан зиддиятга борган, шунингдек, журналистлар орасида “халқ душманлари борлиги” ҳақида кўплаб баёнотлар берган эди.