“Олди-берди”даги 118 миллион сўм ҳақдорлик ундириб берилди

Сўнгги йилларда жисмоний ва юридик шахслар ўртасидаги қарз муносабатлари кўпайиб бораётгани натижасида бу соҳада низолар сони ҳам ошиб бормоқда. Айрим ҳолларда қарздорликни ўз вақтида қайтармаслик иккинчи тарафнинг манфаатларига путур етказиб, суд орқали ҳал этилишини талаб қилади.

Шу муносабат билан Мажбурий ижро бюроси органларида қарз ва қарздорликни ундириш ҳақидаги ижро ҳужжатлари сони ҳам ортиб бораётгани кузатилмоқда.

Жумладан, фуқаролик ишлари бўйича Андижон туманлараро судининг ижро варақасига асосан қарздор М.В.дан ундирувчи Г.Қ. фойдасига 117,9 миллион сўм миқдоридаги қарз ундирилиши белгиланган.

Мазкур суд ҳужжати ижросини таъминлаш мақсадида Мажбурий ижро бюроси Андижон шаҳар бўлими томонидан ижро иши қўзғатилиб, қарздор билан ҳуқуқий тушунтириш ишлари олиб борилди. Кўрилган чоралар натижасида қарздор томонидан қарз миқдори тўлиқ тўланиб, ундирувчи Г.Қ.га 117,9 миллион сўм пул маблағи ундириб берилди.

Берилган қарз ўз вақтида қайтарилмаса, ҳақдорнинг мурожаати орқали у суд ва ижро жараёнига айланиши муқаррар. Зеро, ўзганинг ҳақини вақтида қайтармаслик — жавобгарликка олиб келади.