Бир неча ўн кунлар олдин аёлларнинг бир издиҳомига боришга тўғри келди. Одатда, тўйлар ёки турли маросимларга кам бораман: вақт тиғизлигидан ташқари, асосан дунёвий орзу-ҳаваслардан, молу дунёдан гапириладиган, ғийбат олови билан қизийдиган давралардан иложи борича узоқроқ бўлишга ҳаракат қиламан. Хуллас, мажбурият юзасидан ўша издиҳомга бордим-у, кўп аёлларимизнинг тобора калтабинлашиб бораётганига гувоҳ бўлдим. Каттагина даврада асосий мавзу: қимматбаҳо тақинчоқлар: Дубайда “ишбилармонлик” билан шуғулланадиган ёшгина жувон билагидаги қўш-қўш билакузукларини кўз-кўзлаб, “буниси оқ тилла, буниси қизил тилла” дея шарҳлайди; ёши анчага бориб қолган, лекин юрагидан дунё ҳаваси сўнмаган онахон совет давридаги тиллаларнинг “тоза” бўлганидан ҳикоя қилади; ялтироқ либосларда ял-ял ёниб ўтирган келинчак ёнидаги онасига куёвининг тўйдан олдин ваъда қилган бриллиант кўзли узукни олиб бермаётганидан арз қиларкан, онаси “битта эрни эплаб йўриғига юргиза олмаётган, латта” қизига эрни бошқариш бўйича “қимматли маслаҳатлар” беради; буришган юзларига роса упа-элик чаплаб, ясама таманно билан ўтирган, ёши олтмишлардан ошган аёл яқинда олган келинининг тақиб келган тиллаларидан кўнгли тўлмаганини, қудасининг “таги пастлигини” даврадагиларга достон қилади; “дубайчи” аёлнинг лофларини жон қулоғи билан тинглаб ўтирган жувон “ойликка яшайдиган” эридан ҳасрат қилиб, “Мангаям ўшатлардан иш топиб берсангиз-чи, агар эрим талоқ қўйсаям кетардим” дея кўзига ёш олади...
Энг ёмони, издиҳомдаги ёш келинчакларнинг аксарияти ҳомиладор. Мен уларнинг бағрида шаклланаётган чақалоқларга – келажакнинг эгаларига ачиндим: уларга ғийбат, дунёвий орзу-ҳаваслар, мол-дунё васвасаси қон билан сингдириляпти. Қон билан кирган жон билан чиқади! Ана шундай ғийбатхўр, тиллога ошиқ, мол-дунё васвасасига чалинган оналардан туғилади халқнинг ҳақини еб семирадиган, камбағални туянинг устида итга қоптирадиган ҳаромтомоқлар!
Биз тағин маънавият деб бонг уриб ётибмиз...
“Оила ишларида хотинлар ҳукм юргизган қавм нажот топмайди”, деган эдилар Расулуллоҳ соллаллоҳу алайҳи ва саллам.
Бизга нажот борми?
Дилфуза КОМИЛ
