Норозилик намойишлари: Эрдўған Билги университетини ёпиш ҳақидаги фармонини бекор қилди

Туркия президенти Ражаб Тоййиб Эрдўған талабалар ва ўқитувчиларнинг уч кунлик оммавий норозилик намойишларидан сўнг Истанбулдаги хусусий Билги университетини ёпиш тўғрисидаги фармонини бекор қилди. Олийгоҳ фаолиятини тўхтатиш ҳақидаги фармойиш 21 май куни имзоланганди, уни бекор қилиш тўғрисидаги фармон эса 24 май куни қабул қилинди.

Университет талабалари ва айрим ўқитувчиларининг норозилик намойишлари, хусусан, 24 май куни кампус ҳудудида мингга яқин киши иштирок этган митинглар мақсадга эришишга ёрдам берди. Намойишлар чоғида ўнлаб талабалар университет биносини эгаллаб олган, улар полиция томонидан чиқариб юборилганди. Шунингдек, олийгоҳнинг ёпилиши ҳақидаги хабардан сўнг талабалар университетда тунаб қолиб, ўз норозилигини ифода этди.

Университетнинг ёпилиши 2025 йил сентябридан буён Истанбулнинг йирик Can Holding ҳолдингига нисбатан олиб борилаётган фирибгарлик ва солиқ тўлашдан бўйин товлаш бўйича тергов доирасида содир бўлди. 120 дан ортиқ компанияни (жумладан, йирик телеканалларни) бирлаштирган ушбу ҳолдинг 2019 йилдан буён университетга ҳомийлик қилиб келаётганди. Ҳозирда ҳолдинг таркибига кирувчи компаниялар давлат назорати остида.