Янги қурилган кўп қаватли уйларнинг нархини эшитган аксарият юртдошларимиз “Яхшиси ўзим “нол”дан уй қуриб, бу пулнинг ярмидан кўпини тежайман” деган гапни айтишади. Хўш, уй қуриш ростдан ҳам анча арзонга тушадими? Бунда қандай машаққатларга дуч келамиз?
Арзон уй-жойларда учрайдиган асосий камчиликлар
Майдони кичкина. Уй унда истиқомат қилувчиларнинг эҳтиёжларига жавоб берадиган, қулай ва шинам бўлиши керак.
Ноқулай. Уй оилангизнинг турмуш тарзига мос келиши керак.
Сифатсиз. Уй қуришда фойдаланилган қурилиш материалларининг сифатига алоҳида эътибор қаратиш зарур.
Уй қуришда эътибор қаратишингиз ва иқтисод қилиш тавсия этилмайдиган жиҳатларнинг энг асосийларини санаб ўтдик. Энди навбат пулни тежаш мумкин бўлган қисмга.
Қурилишда пулни тежаш мумкин бўлган жиҳатлар
- Уйни лойиҳалаштиришни мустақил танлаш билан сиз яхшигина маблағ тежашингиз мумкин. Бунда уйни режалаштириш ва конструктив элементларни қўллашда улар ҳамёнбоп бўлишига эътибор қаратинг.
- Тайёр лойиҳаларни таклиф қиладиган меъморларни уйнинг қурилиши қанчага тушиши қизиқтирмайди. Уларнинг вазифаси – чиройли уй суратига сизни мафтун қилиш ва лойиҳани сотиш.
- Қиммат бўлмаган уй асосан бир қаватли, умумий майдони — 100-150 м² бўлган, ертўласи йўқ (ертўла харажатларни тахминан 30 фоизга оширади), тўртбурчак шаклда, стандарт ўлчамдаги дераза ва эшикларга эга бўлади. Катта, кўп сонли деразалар ва эшиклар, ноодатий зиналар ҳам қурилиш сарф-харажатларини ошириб юборади.
- Интеръер ишлари ҳам соддароқ бўлгани маъқул. Яъни анъанавий штукатурка қилинган ёки гипсокартонли деворлар, пол —ламинат, ювиниш хонаси — оддий сантехника билан жиҳозланган.
- Қурилиш материалларини танлаш, сотиб олиш ва қурилиш майдонига олиб келишни ўз зиммангизга олган ҳолда ҳам яхшигина маблағни иқтисод қиласиз.
- Бир иш учун турли қурилиш гуруҳлари турлича нарх белгилайди. Аммо жамоанинг аввалги обектлари билан танишишни унутманг.
Энг ҳамёнбоп қурилиш материаллари
Энди эса юртимиз иқлими ва шароитига мос бўлган энг арзон ҳамда замонавий қурилиш материаллари билан танишамиз.
- Газобетон ва пенобетон – енгил ва қурилишда бир қанча қулайликлари мавжуд. Бошқа қурилиш материалларига нисбатан иссиқликни яхши ушлайди (теплоизоляция);
- Каркас қурилиш – қурилишнинг энг арзон тури бўлиб, турли иқлим шароитларига мос. Аммо бунда хонани шамоллатиш (вентиляция) масаласига эътибор қаратишга тўғри келади;
- Шлакоблок – замонавий шлакоблокларнинг таркиби такомиллашган бўлиб, арзон, енгил, ёнғинга қарши хусусиятларга эгалиги, кемирувчилар ва моғорлардан холи эканлиги, ултрабинафша ва кимёвий таъсирга чидамлилиги билан ажралиб туради. Лекин уй қуришда шлакоблок ишлатганда уни қўшимча равишда иситиш (теплоизолация) мосламалари билан ўраш талаб этилади.
Қисқаси мустақил уй қуришнинг ўзига хос машаққатлари борлигига амин бўлдингиз. Балки анашу машаққатлар сабабли ҳам биз учун ўзимиз қурган уйнинг қадри баланд бўлар?
