Ноаниқликлар ва савдо урушларига қарамасдан, АҚШ иқтисодиёти юқори суръатларда ўсмоқда

Учинчи чоракда АҚШ Иқтисодиёти (кутилмаганда) жуда юқори 4,3 фоизга ўсган . Бунда, хусусий истеъмол (3,5 фоиз) ҳамда экспортнинг (8,8 фоиз) юқори ўсиши ЯИМ ўсишини тезлаштирувчи омиллар бўлиб хизмат қилган. Бу икки компонент ЯИМнинг 3,31 фоизга ўсишини таъминлаган. Шунингдек, давлат харажатларининг (истеъмол) ҳам юқори ўсиши қайд этилган. Учинчи чоракда давлат харажатлари 2,2 фоизга ўсган. Таққослаш учун давлат харажатлари биринчи чоракда -1 фоизга, иккинчи чоракда -0,1 фоизга қисқарган эди. Инвестициялар эса кетма-кет иккинчи чорак қисқарган (иккинчи чорак -13,8 фоиз, учинчи чорак -0,3 фоиз).

Таъкидлаш керакки, меҳнат бозорида янги иш ўринларининг пасайиши ва ишсизликнинг ўсиши кузатилмоқда. Хусусан, сентябрь ойида ишсизлик июнь ойига нисбатан 0,3 фоизга ошиб, 4,4 фоизга етган. Яратилган иш ўринлари эса 147 мингдан, 119 мингача пасайган (ноябрь ойида 64 минг . Марказий банк меҳнат бозоридаги “совуш” фонида асосий ставкани икки марта пасайтиришга улгурди. Хўш бундай ҳолатда иқтисодиётнинг юқори ўсиши нимадан далолат беради?

Жасон Фурман бу ҳолатни Меҳнат бозори бўйича бирламчи рақамларнинг пессимистиклиги ва кейинчалик тўғриланиши ёки ЯИМ бўйича рақамларнинг жудаям оптимистлиги ва кейинчалик қайта кўриб чиқишда пасайтирилиши мумликлигини таъкидлаган. Шунингдек, сунъий интеллектдан фойдаланиш даражасининг ортишиши самарадорликни ошираётган бўлиши мумкин. Яъни сунъий интеллект ёрдамида камроқ ишчилар билан олдинги даражадаги ишни қилиш мумкин бўлмоқда. Бу эса меҳнат бозори “совиётган” бўлишига қарамасдан, ЯИМда нисбатан соғлом ўсишга олиб келиши мумкин.

Таъкидлаш керакки, ҳозирча Трамп яратган ноаниқликлар ва савдо урушлари ЯИМнинг секинлашишида намоён бўлаётгани йўқ. Бу ҳолатга ички истеъмолнинг кучли сақланиб қолаётганлиги асосий фактор бўлаётган бўлса, долларнинг қадрсизланиши соф экспортнинг яхшиланишига хизмат қилмоқда.

Лекин барибир меҳнат бозоридаги секинлашиш яқин келажакда ЯИМда ҳам пасайишларга олиб келса керак.