Нетаняҳу Трампни Тинчлик бўйича Нобел мукофотига номзод сифатида кўрсатди

Бу ҳақда Deutsche Welle нашри хабар бермоқда.

Нашрнинг ёзишича, Исроил бош вазири Бинямин Нетаняҳу “тинчликни мустаҳкамлаб бораётгани” учун АҚШ президенти Доналд Трампни Тинчлик бўйича Нобел мукофотига номзод сифатида кўрсатди. Нетаняҳу бу ҳақда Оқ уйда бўлиб ўтган кечки овқат чоғида маълум қилди.

Исроил бош вазири Ғазо секторида ўт очишни тўхтатиш бўйича музокараларнинг иложи борича тезроқ якунланишини истаётганини ҳам айтиб ўтди. Нетаняҳу Оқ уйдаги учрашувда Нобел қўмитасига юборилган мактуб нусхасини Трампга топширди.

Аввалроқ Трампни Нобел мукофотига Покистон ҳам номзод қилиб кўрсатган эди. 10 май куни ушбу давлат расмийлари АҚШ воситачилигида Ҳиндистон билан бир неча кун давом этган қуролли можарони тўхтатиш борасида келишувга эришилганини маълум қилганди. Исломобод Трампнинг номзодини илгари сурар экан, унинг “қатъий дипломатик аралашуви ва муҳим етакчилик ролини” алоҳида таъкидлаган эди.