Nestle Ўзбекистонда болалар озуқасининг айрим партияларини қайтариб олади

Nestle компанияси эҳтимолий цереулид токсини хавфи сабаб айрим болалар озуқаси маҳсулотларини Ўзбекистонда ихтиёрий равишда қайтариб олишни эълон қилди. Қарор глобал қайтариб олиш жараёни доирасида, эҳтиёт чораси сифатида қабул қилинган.

Токсин ташқи таъминотчи етказиб берадиган арахидон кислотаси таркибида бўлиши мумкин. У ўткир заҳарланишга олиб келиб, кўнгил айниши, қусиш ва қорин оғриғини келтириб чиқаради.

Қайтариб олиш қуйидаги маҳсулотларнинг айрим партияларига тегишли:
➖ NAN 1 OPTIPRO;
➖ NAN 2 OPTIPRO;
➖ NAN Kislomolochniy (0–12 ой);
➖ NAN Supreme (0–12 ой);
➖ ALFARE Amino.
Кеча Россия ҳам сотувни тўхтатган эди.

Nestle регулятор органларни хабардор қилган. Қайд этилган партияларни харид қилган истеъмолчилар маҳсулотни белгиланган тартибда қайтариши мумкин. Бошқа партиялар ва Nestle’нинг бошқа болалар озуқаси маҳсулотларига бу қарор тегишли эмас.