Иттифоқчилар Шимолий Корея қўшинларининг Россияга ўтказилишини тасдиқлади. Агар бу қўшинлар Украинадаги урушда иштирок этишни мақсад қилган бўлса, бу Шимолий Кореянинг Россиянинг ноқонуний агрессиясини қўллаб-қувватлаганлиги сабабли вазиятнинг сезиларли даражада кескинлашишини англатади ва Россиянинг фронтдаги катта йўқотишларининг яна бир далили бўлади.
НАТО бош котиби Марк Рютте Шимолий Кореяни Украинага қарши урушда қатнашиш учун Россияга қўшин юборишдан огоҳлантирди. «Бу сезиларли даражада кескинлашувга олиб келади», деб ёзди у Х ижтимоий тармоғидаги саҳифасида.
Рюттенинг сўзларига кўра, у аллақачон Жанубий Корея президенти Юн Сук Ёл билан вазиятни муҳокама қилган, олинган разведка маълумотларига кўра, Шимолий Корея Россияга 1500 нафар аскарини жўнатган. Жанубий Корея разведкаси маълумотларига кўра, бу аскарлар Россия шарқида тайёргарликдан ўтмоқда ва Украинадаги фронт чизиғига жўнатилади.
Аввалроқ Жанубий Кореянинг Yonhap ахборот агентлиги разведка манбаларига таяниб, Пхенян фронтга «тўртта бригада, жумладан, махсус кучлар бўлинмаларини жами 12 минг нафар аскар» жўнатишни режалаштираётгани ҳақида хабар берган эди.
Брюсселда бўлиб ўтган матбуот анжуманида ушбу маълумотни изоҳлар экан, Рютте Шимолий Корея қўшинларининг жанговар ҳаракатларда фаол иштирок этгани ҳақида тасдиқланган маълумотлар йўқлигини таъкидлади. Шу билан бирга, у Пхеняннинг Москвага қурол-яроғ, технология ва янги ишланмалар кўринишида кенг кўламли ёрдам кўрсатаётганига ишора қилди, бу эса Украина иттифоқчилари орасида хавотир уйғотмоқда, деб ёзади кун.уз.
Мактабларда кузги таътил вақти эълон қилинди
Эрон ўраб олинмоқда
Эрталабдан Исроилга юзлаб ракеталар ташланди
