“Насаф” ғалаба қозонди, “Навбаҳорда” дуранг “ОКМК” эса мағлуб бўлди

Футбол бўйича Осиё чемпионлар лигаси гуруҳ босқичининг биринчи тур учрашувларига старт берилди. Унда “Насаф”, “ОКМК” ва “Навбаҳор” каби клубларимиз ўзларининг илк ўйинини ўтказди.

Иорданиянинг “Ал-Файсали” клубига қарши ўтган ўйинда Қарши шаҳрининг “Насаф” жамоаси 0:1 ҳисобида ғалаба қозонди. Мазкур ўйиндаги ягона голга 90+8 дақиқада Зафармурод Абдураҳматов муаллифлик қилди. Шунингдек, “B” гуруҳидан ўрин олган иккинчи ўйинда “Ас-Садд” – “Шаржа” ўзаро рақобатлашди. Ушбу ўйин 1:1 ҳисобида якунланди.

Ушбу натижадан сўнг “Насаф” ўз гуруҳи пешқадамига айланди.

Жидда шаҳридаги “Abdullah Ал-Faisal Stadium”да ўтган “Ал Иттиҳод” ва “ОКМК” учрашувида афсуски ҳисоб 3:0 кўринишини олди. Ўйинда майдон эгаларига ғалаба келтирган голларни Камара ва Ромаринё (дубль) жамоамиз дарвозасига киритди.

Осиё чемпионлар лигаси “C“ гуруҳидан ўрин олган ”Эйр-Форс“ — ”Сепаҳон” баҳсида 2:2 натижаси қайд этилди.

Шу тариқа мазкур гуруҳда “Ал Иттиҳод” 3 очко билан гуруҳда 1-поғонага чиқиб олган бўлса “Эйр Форс” иккинчи, “Сепаҳон” эса учинчи поғонадан жой олди.

Осиё чемпионлар лигаси “D” гуруҳида биринчи турнинг энг қизиқарли ва муросасиз ўтган баҳси Ар-Риёд шаҳрида жойлашган “Қирол Фаҳд” стадионида ўтди. Унда мезбон жамоа “Ал-Ҳилол» ва Наманганнинг “Навбаҳор” клуби баҳс олиб борди.

Учрашувнинг 52-дақиқасида Тома Тобатадзе рақиб дарвозасини ишғол қилиб, “Навбаҳор”ни олдинга олиб чиқди. Иккинчи бўлим якунланиши арафасида учрашув ҳаками ўйинга 14 дақиқа қўшиб берди. Қўшимча вақтнинг 10 дақиқасида Ал-Булайҳи гол уриб мувозанатни тиклади. Шу тариқа, ўз таркибида бразилиялик Неймар ва бир қатор маҳоратли футболчилари бўлган “Ал-Ҳилол» клуби ўз майдонида дуранг қайд этди.

Шунингдек, гуруҳнинг иккинчи ўйини “Мумбай Сити” ва “Насажжи Мозандарон” жамоалари ўртасида ўтди. Ушбу баҳсда меҳмонлар 2:0 ҳисобида ғалаба қозонди.

Шундай қилиб, бу гуруҳда “Насажжи Мозандарон” 3 очко билан яққол пешқадамга айланиб олди. “Ал-Ҳилол» ва “Навбаҳор” клублари эса 1 очко билан иккинчи ҳамда учинчи ўринни эгаллади.

Энди Осиё чемпионлар лигасининг иккинчи турида “ОКМК” ўз майдонида “Эйр-Форс”ни қабул қилса, Қаршида “Насаф” “Ас-Садд”ни синовдан ўтказади. Бу баҳслар 2 октябрь куни бўлиб ўтади. 3 октябрь куни эса “Навбаҳор” ва “Мумбай Сити” клублари ўзаро рақобатлашади.