Москва вилоятининг Раменск шаҳрида мигрантлар ўртасида оммавий муштлашув содир бўлди. Бу ҳақда Россия Тергов қўмитаси ўзининг Телеграм-каналида маълум қилди.
«Ижтимоий тармоқлар Раменск шаҳрида мигрантлар оммавий муштлашув уюштиргани ҳақида хабар бермоқда. Мазкур ҳолат бўйича Москва вилояти Давлат тергов бошқармасининг тергов органлари томонидан Россия Федерацияси Жиноят кодексининг 213-моддаси (безорилик) билан жиноят иши қўзғатилди», — дейилади бошқарма хабарида.
Тергов қўмитаси раҳбари Александр Бастрикинга терговнинг бориши ва жиноятнинг аниқланган ҳолатлари тўғрисида ҳисобот тақдим этилади. Мурожаатда маҳаллий аҳоли бу борада ҳуқуқ-тартибот идоралари ва маҳаллий давлат идораларига бир неча бор мурожаат қилгани, аммо ҳалигача муҳожирларга нисбатан чора кўрилмагани алоҳида таъкидланган.
