Москва Украина учун тинчлик шартларини эълон қилди

Россия ташқи ишлар вазири Сергей Лавров Украинадаги можарони фақат қонуний кучга эга бўлган келишувлар тузилиши билан ҳал қилиш мумкинлигини айтди. У бу келишувларга айнан нималар киритилишига аниқлик киритмади.

Лавровнинг таъкидлашича, Россия ўзининг “махсус ҳарбий операцияси” (Россия расмийлари уруш деб атаган) мақсадларига эришиш ва инқироз сабабларини бартараф этишга интилмоқда.

Қирғизистон Ташқи ишлар вазирлиги раҳбари Жеенбек Кулубоев билан учрашувдан сўнг ўтказилган матбуот анжуманида россиялик вазир шундай деди: “Биз Украина можароси атрофидаги вазиятни муҳокама қилдик ва “махсус операция” мақсадларига эришиш бўйича содиқлигимизни тасдиқладик. Инқирозни унинг сабабларини бартараф этиш орқали ҳал қилиш мумкин. Бу нафақат Европада, балки АҚШда ҳам тушунила бошланди”.

Лавровнинг сўзларига кўра, ўт очишни тўхтатиш бўйича келишувлар қонуний кучга эга бўлиши ва уларнинг бузилиши эҳтимолини истисно қилиши керак.

Украина президенти Владимир Зеленский аввалроқ, агар Украина НАТОга қисман қўшилса ва ҳарбий ёрдам олишда давом этса, тинчлик музокараларига тайёр эканини айтган эди. Бироқ у Киев ўз ҳудудлари – Қрим, Донецк, Луганск, Херсон ва Запорожье вилоятларидан воз кечмаслигини таъкидлади. Зеленскийнинг фикрича, улар ҳарбий ҳаракатлар тугаганидан кейин дипломатик йўл билан қайтарилиши мумкин.

Россия 2014-йилда Қримни, 2022-йилда эса Донецк, Луганск, Херсон ва Запорожье вилоятларини референдум натижаларига асосланиб аннекция қилган эди. Халқаро ҳамжамият бу ҳудудларни Россия деб тан олишдан бош тортди. Украина ва Ғарб давлатлари бу референдумларни тан олмади ва уларни аннекция деб аташди.

Россия президенти Владимир Путиннинг айтишича, можаро Украинанинг НАТОга кириш истаги туфайли бошланган. Музокаралар шартлари орасида у Украина қўшинларининг Донбасс, Херсон ва Запорожье вилоятларидан олиб чиқилиши, бу ҳудудларнинг Россия таркибига киритилиши, Киевнинг НАТОга аъзо бўлишдан бош тортиши ва Россия иқтисодиётига нисбатан санкцияларнинг бекор қилинишини кўрсатди. Зеленский бу талабларни рад этиб, уларни ултиматум деб атади.

22 январ куни Хитой раҳбари Си Цзиньпин билан суҳбатда Путин Украинада тинчлик узоқ муддатли бўлиши ва Россия манфаатларини ҳисобга олиши кераклигини таъкидлади.