Миср президенти Абдулфаттоҳ ас-Сисий Эрон президенти Масуд Пезешкиан билан телефон орқали мулоқотда Эрон ядровий муаммоси бўйича жиддий ва конструктив мулоқотни қайта бошлаш ва музокаралар столига қайтиш зарурлигини таъкидлади, деб хабар берди Миср президенти идораси.
Сисий минтақада кескинлик кучайиб бораётган шароитда “барқарорликни мустаҳкамлаш, тинчлик ва хавфсизликка путур етказиш уринишларига қарши курашиш бўйича қўшма ҳаракатларни фаоллаштириш” муҳимлигини қайд этди. У, шунингдек, Қоҳира вазиятни юмшатишга қаратилган саъй-ҳаракатларни қўллаб-қувватлашга тайёрлигини билдирди.
“Томонларнинг Эрон ядровий муаммоси бўйича музокаралар столига қайтиши минтақавий хавфсизликни таъминлайдиган ва янада кескинлашувнинг олдини оладиган тинч йўлдаги ечимга эришишнинг зарурий шартидир”, — деди Сисий.
Пезешкиан эса Эрон ва Халқаро атом энергияси агентлиги (МАГАТЭ) ўртасидаги мулоқотга ёрдам бергани учун Мисрга миннатдорлик билдирди ҳамда Сисийнинг шахсий саъй-ҳаракатлари ва қўллаб-қувватлаши Эрон ва агентлик позицияларини яқинлаштиришда муҳим аҳамиятга эга бўлганини қайд этди.
Бу ҳаракатлар Миср воситачилигида Эрон ва МАГАТЭ ўртасидаги ҳамкорликни қайта тиклаш бўйича Қоҳирада имзоланган келишувга олиб келди.
9 сентябр куни Қоҳирада Сисий, Эрон ташқи ишлар вазири Аббос Арагчи ва агентлик бош директори Рафаэл Гросси иштирокидаги уч томонлама учрашувдан сўнг Эрон ва МАГАТЭ ўртасидаги ҳамкорликни тиклашга оид келишув эълон қилинди.
Саудия Арабистони ва Уммон ҳам Миср воситачилигида эришилган келишувни қўллаб-қувватлади.
Эслатиб ўтамиз, 26 июн куни Эрон парламенти МАГАТЭни жосусликда айблаб, у АҚШ ва Исроил манфаатларига хизмат қилаётганини билдириб, агентлик билан ҳамкорликни тўхтатувчи қонун қабул қилган эди.
2025 йил июн ойида Исроилнинг АҚШ қўллаб-қувватлови билан Эронга қарши 12 кунлик ҳужуми ва Теҳроннинг жавоб зарбалари ортидан 22 июнда Вaшингтон сулҳ эълон қилганди.
