Мерц: "Ғарб Украинага қўшин юбормайди"

Германия канцлери Фридрих Мерц Украинада ўт очишни тўхтатмагунча, у ерга Ғарб қўшинларини юбориш ҳақида гап бўлиши мумкин эмаслигини айтди.

Бу ҳақда у Sat.1 телеканалига берган интервьюсида айтиб ўтди.

"Ўша пайтгача (ўт очишни тўхтатиш) Украинага қўшин юборилмайди”, деди у. Унинг сўзларига кўра, сулҳ ўрнатилган тақдирда ҳам, бу фақат "муҳим шартлар билан" Германия учун мумкин бўлади; бу йўлда "кўп тўсиқлар" бор. Унинг қўшимча қилишича, "ҳар қандай ҳолатда ҳам Германия Украинада ҳарбий миссия ўтказишни режалаштирмаган".

Шу билан бирга, канцлер Украинага ҳарбий ёрдам кўрсатиш масалалари Еврокомиссия (ЕК) эмас, хоҳловчилар деб аталмиш коалиция ваколатига киришини таъкидлади. "Бу Европа Иттифоқининг ваколатига кирмайди", деди у.

Аввалроқ Европа Иттифоқи президенти Урсула фон дер Ляйен Financial Times газетасига берган интервьюсида Европада ўт очишни тўхтатишдан кейин хавфсизлик кафолатларини таъминлаш доирасида Украина ҳудудига қўшинларни жойлаштириш бўйича "жуда аниқ режа" борлигини айтган эди. Унинг сўзлари Германия мудофаа вазири Борис Писториус томонидан кескин танқид қилинди ва у музокаралар бошланишидан олдин бундай масалаларни муҳокама қилиш тубдан нотўғри эканлигини таъкидлади.