Менимча, Куба қулашга тайёрланмоқда — Доналд Трамп

АҚШ томонидан Кубада ҳарбий аралашув эҳтимолдан йироқ, чунки орол ҳалокат ёқасида, деди Доналд Трамп.

"Менимча, Куба қулашга тайёрланмоқда. Мен Куба ҳукумати мамлакат устидан назоратни қандай ушлаб турганини билмайман, аммо ҳозир Кубанинг ҳеч қандай даромади йўқ. Улар барча даромадни Венесуэла нефтидан оларди. Энди улар бундан маҳрум бўлди. Куба том маънода ҳалокат сари бормоқда. Бу ҳолатдан мамлакатнинг кўпчилик аҳолиси жудаям хурсанд бўлади", — дея фикр билдирди АҚШ президенти.

Шунингдек, АҚШ раҳбари Венесуэладаги операцияда кўплаб кубаликлар ўлдирилганини, улар кубалик хавфсизлик ходимлари эканини маълум қилди.

"Биласизми, у ерда кўплаб кубаликлар ўлдирилди", — деди Трамп Air Force One самолётида журналистларга.

"Куба ҳукумати АҚШ амалиёти натижасида 32 киши ҳалок бўлганини хабар қилди. 5 ва 6 январ кунлари мамлакатда мотам кунлари деб эълон қилинди", деб ёзади Reuters.