Мексика президенти Трампнинг АҚШ қўшинларини юбориш таклифини рад этди

Мексика президенти Клаудия Шейнбаум АҚШ президенти Дональд Трампнинг мамлакатдаги наркотик картелларига қарши курашиш учун Мексика ҳудудига Америка қўшинларини юбориш таклифини қатъий рад этди.

Миллий саройда ўтказилган кундалик матбуот анжуманида Шейнбаум Трампнинг таклифини танқид қилиб, бу масала муҳокама қилинмаслигини билдирди.

Президентнинг таъкидлашича, Мексика АҚШ билан ҳамкорликка очиқ, бироқ суверенитетга тажовуз қилмайдиган шаклдаги маълумот алмашинуви билан чекланиши мумкин.

«Трампга бир неча бор айтганман: биз ҳамкорлик қилишимиз мумкин, уларда мавжуд маълумотларни баҳам кўриш орқали бизга ёрдам бериши мумкин. Лекин ўз ҳудудимиздаги операцияларни ўзимиз амалга оширамиз. Биз ҳеч қандай хорижий ҳукуматнинг аралашувини қабул қилмаймиз», — деди Шейнбаум.

Унинг сўзларига кўра, у Трамп билан телефон мулоқотлари чоғида ҳам қўшин юбориш таклифини рад этган.

«Президент Трамп буни неча марта таклиф қилганини санаб бўлмайди. У “керак бўлса, Мексикага АҚШ қўшинларини юборишга тайёрмиз”, деб бир неча бор айтган. Мен эса фақат ҳамкорликка тайёрлигимизни билдирганман», — деди у.

Шейнбаум мамлакат суверенитетини ҳимоя қилиш улкан аҳамиятга эга эканини таъкидлади.

«Биздаги келишувлар ҳамкорлик ва мувофиқлаштиришга асосланади. Биринчи ва асосий шарт — суверенитет ва ҳудудий яхлитликка ҳурмат. Биз ҳеч қандай бўйсуниш шаклини қабул қилмаймиз ва ҳеч қайси хорижий ҳукуматнинг аралашувини истамаймиз», — деди у.

5 ноябр куни Шейнбаум Трамп маъмуриятининг Мексикага ҳарбий ва разведка ходимларини юборишни режалаштираётгани ҳақидаги даъволарни рад этган эди ва мамлакат «ҳар қандай аралашувга қарши» эканини қайд этган.

Бир кун олдин эса Трамп Мексикага наркотик савдосига қарши курашиш мақсадида ҳарбийлар юборилиши мумкинлиги ҳақидаги саволга жавоб берар экан, бу унга «муаммо бўлмаслигини» айтган эди.