Манба: Мбаппеда руҳий муаммолар кузатилмоқда

Мадриднинг «Реал» клубининг франциялик ҳужумчиси Килиан Мбаппеда руҳий муаммолар борлиги айтилмоқда.

«Буни хоҳлаганингизча талқин қилинг, лекин Килиан бир неча ойдан бери руҳий муаммоларга дуч келмоқда. У ўз-ўзидан ўтиб кетмайди. Бу вақт ва меҳнат талаб қилади, у буни мутахассислар билан амалга оширади», деди Мбаппега яқин одамлардан бири L’Equipe нашрига.

Жорий мавсумда 25 ёшли Мбаппе барча турнирларни ҳисобга олган ҳолда 16 та ўйинда қатнашиб, 8 та гол урди ва 2 та голли узатмани амалга оширди.

Футболчининг «Реал» билан шартномаси 2029 йилнинг июнь ойи охиригача амал қилади. Француз ҳужумчиси қироллик жамоасида кутилгандек ёрқин ўйнай олмаяпти, клуб ҳам қийин мавсумни ўтказмоқда.

Аввалроқ Мбаппе Франция термасида ўйнашдан бош тортгани хабар қилинганди. У Диде Дешам билан келишмовчиликка боргани тахмин қилинмоқда.