Мадуро АҚШдаги ҳибсхона ичидан олинган илк суратларини эълон қилди

Венесуэланинг собиқ президенти Николас Мадуро АҚШдаги ҳибсхона ичидан олинган илк суратларини эълон қилди.

У январ ойида АҚШ махсус кучлари томонидан Венесуэладан олиб кетилганидан буён Нью-Йоркнинг Бруклин туманидаги федерал ҳибсхонада сақланмоқда.

Мадуро суратларни якшанба куни Х ва Теlegram'даги саҳифаларида эълон қилди.

Суратларда Мадуро кулранг спорт кийимида тасвирланган. У икки қўли билан “V” ишорасини кўрсатиб турибди. Собиқ президентнинг қўлга олинганидан бери анча вазн йўқотгани кўринади.

"Мен бу суратларни барча набираларимга, барча ўғил-қизларга ва бизни яхши кўрадиган барча яхши инсонларга кичик совға сифатида юборяпман", — деб ёзди у испан тилида.

Шунингдек, у қатъият билан туришини таъкидлаб, Худо унга йўл кўрсатишига ишонч билдирган.

"Шуни билишингизни истайманки, биз қатъият билан турибмиз, қалбларимиз сизнинг меҳрингизга тўла. Биз кучли, хотиржам ва ишонч билан қоламиз. Яратган биз билан, у йўл кўрсатади. Венесуэла яна юксалади", — дея қўшимча қилган Мадуро.

Суратлардаги вақт белгиларига кўра, улар 25 июн куни олинган. AFP агентлиги суратларнинг ҳақиқийлиги ва уларни эълон қилишга ҳибсхона маъмурияти томонидан рухсат берилган-берилмаганини аниқлаш учун муассаса билан боғланишга уринган. Бироқ агентлик ҳозирча жавоб олмаган.