"Лукойл" улушини Америка компанияси сотиб оладими?

АҚШ ҳукумати Ироқнинг "Лукойл"нинг "Ғарбий Қурна-2" нефть конидаги улушини Америка компаниясига ўтказиш режасини қўллаб-қувватлади.

Бу ҳақда Bloomberg манбаларга таяниб хабар берди.

“Бизни Ироқ Нефть вазирлигининг Exxon ва Chevron компаниялари билан тузган дастлабки келишувлари, шунингдек, яқинда "Ғарбий Қурна-2"ни АҚШ операторига ўтказиш мажбурияти рағбатлантирди" - деди Давлат департаменти вакили.

Шунингдек, у АҚШ Ироқдаги компаниялари манфаатларини ҳимоя қилишда давом этишини қўшимча қилди.

1 декабрь куни Ироқ Нефть вазирлиги бир неча Америка компанияларини "Ғарбий Қурна-2" конини бошқариш ҳуқуқини берувчи тендерда иштирок этишга таклиф қилди. Ушбу компаниялар рўйхати ошкор этилмаган. Бироқ, кейинроқ маълум бўлишича, "Ғарбий Қурна-2" улушига эга бўлган Россиянинг "Лукойл" компанияси ўзининг хорижий активларини сотишни режалаштирмоқда. Американинг Chevron ва Exxon компаниялари "Лукойл"нинг Ироқдаги улушини сотиб олишни режалаштирган эди.