Беларусь президенти Александр Лукашенко Ўзбекистондан ишчиларни жалб қилиш масаласига тўхталиб, мамлакатга келаётган меҳнат муҳожирлари мақсади фақат юқори даромад топиш эмас, балки қишлоқ хўжалиги соҳасида ишлаш бўлиши кераклигини айтди.
Унинг таъкидлашича, Беларусь ва Ўзбекистон ўртасида қишлоқ хўжалиги соҳасида ҳамкорлик қилиш, жумладан, гўшт ва сут маҳсулотлари ишлаб чиқариш учун ўзбекистонлик ишчиларни жалб қилиш бўйича келишувларга эришилган, катта маош олиш учун эмас.
"Агар бу ерга кимлардир 5000 долларлаб ойлик олиш учун келмоқчи бўлса, яхшиси Россияга борсин", деган у.
Лукашенко июль ойи бошида Минскда Ўзбекистон президенти Шавкат Мирзиёев билан учрашув ўтказгани ва ўшанда ўзбекистонликларни Беларусда яшаш ҳамда ишлашга таклиф қилганини эслатди.
Шундан кейин Андижон вилоятидан 250 нафардан ортиқ фуқаро қишлоқ хўжалиги ва чорвачилик соҳасида вақтинчалик ишлаш учун Беларусга борган. Бироқ, улар таклиф қилинган иш ҳақи — ойига тахминан 500 доллар миқдоридаги маошдан норозилигини билдирган. Меҳнат муҳожирлари бундай даромадни Ўзбекистонда ҳам топиш мумкинлигини айтган.
Беларусь президенти эса, мамлакатга бир неча минг доллар ишлаб топиш мақсадида келмоқчи бўлганлар Россияда ишлаш имкониятини кўриб чиқиши мумкинлигини билдирди. Унинг сўзларига кўра, Беларусга келаётган ишчилар асосан қишлоқ хўжалиги маҳсулотлари ишлаб чиқариш жараёнларида иштирок этиши кўзда тутилган.
Лукашенко хорижий ишчиларга мамлакат фуқаролари каби ижтимоий хизматлар ва кафолатлар тақдим этилишини ҳам таъкидлаган.
Эслатиб ўтамиз, маошлар ва ишлаш шароитидан шикоят қилиб видемурожат йўллаган юртдошимиз видео тарқалганидан бир неча соатлар ўтиб, у видео эски экани, ҳозир вазият ундай эмаслиги, ҳаммаси жуда яхшилигини таъкидлаб, қайта видео чиқарган эди.
Ўн йилдан сўнг пулнинг аҳамияти деярли қолмайди
1 августдан автомобиллар учун газ бепул бўлади
Россияда мигрантларни депортация қилиш учун асослар кенгайтирилди
