Лондон Россиянинг музлатилган активларини Киевга топшириш тарафдори

Буюк Британия парламенти аъзолари мамлакат Россиянинг музлатилган активларини Украинага ўтказиши керак, деб ҳисоблайди. Британиянинг The Times газетасида 6 январ, душанба куни чоп этилган очиқ хатида сиёсатчилар ҳукумат Россия Марказий банкининг турли мамлакатларда музлатилган захираларидан 300 миллиард долларни Украинага қонуний йўл билан ўтказишни аниқлаши кераклигини таъкидламоқда. Уларнинг қўшимча қилишича, Буюк Британия ҳисобларида сақланадиган камида 25,5 миллиард фунт стерлингни ўтказиш стратегик қарорнинг «аниқ сигнали» бўлиб, келажакдаги можароларнинг олдини олишга ёрдам беради.

«Аввалги кредитлар ва фавқулодда молиялаштириш етарли эмас, - деб ёзади депутатлар. - Фақат активлардан фойдаланиш Россия ўз жиноятлари учун тўлашини кафолатлайди».

Хат Россиянинг музлатилган активларидан Украинани уруш пайтида молиялаштириш учун фойдаланиш бўйича парламент муҳокамаси олдидан ёзилган. Музлатилган маблағлар компания акциялари ва банк ҳисобварақларидаги нақд пулларнинг бирикмасидир. Катта еттилик давлатлари аллақачон Украинага 50 миллиард доллар миқдорида кредит ажратиш мажбуриятини олган, у музлатилган активлардан олинган фоизлар ҳисобига қайтарилади. Шу билан бирга, Ғарб сиёсатчиларининг фикрича, активларни Киевга топширишнинг ўзи ҳуқуқий муаммолар билан тўла бўлади.

Шунингдек, Япония ҳукумати Россиянинг музлатилган активларидан тушган даромад ҳисобидан Киевга яна 3 миллиард доллар ўтказади. Бу ҳақда 25 декабр куни Украина президенти Владимир Зеленскийнинг Япония бош вазири Шигеру Ишиба билан телефон суҳбатидан сўнг маълум қилди.