Буюк Британиянинг энг йирик мудофаа компанияси — BAE Systems кўп мақсадли Eurofighter Typhoon учқучисиз жангувчи самолётларини ишлаб чиқаришни вақтинча тўхтатди. Бу қарорга янги буюртмалар йўқлиги сабаб бўлган.
Ҳозирда Уортон шаҳридаги завод Қатарга 2017 йили тузилган 5 миллиард фунт стерлинглик шартнома доирасида охирги самолётни етказиб беришга тайёргарлик кўрмоқда.
🗣 «Ҳанузгача бирта учқучисиз жангувчи самолёт ангарда турибди. У фақат тўлиқ жиҳозланиши ва бўялиши керак. Асосий йиғувчи линия эса тўхтатилган — у ерда ҳеч қандай ишчи йўқ», — деди касаба уюшмаси вакили.
Буюк Британия ҳукумати 2009 йилдан бери Eurofighter Typhoon учун янги буюртма бермаган, Саудия Арабистони, Қатар ва Туркия билан янги экспорт шартномалари эса ҳали келишилмаган.
Агар янги буюртмалар бўлмаса, мамлакат GCAP (янги авлод жангувчи самолётлари яратиш дастури)да қатнашиш учун зарур бўлган индустриал салоҳият ва мутахассислик кўникмаларини йўқотиш хавфига дуч келади.
Мудофаа вазири Жон Гили ҳозирча мавжуд Typhoon самолётларини модернизация қилиш учун янги буюртма берилишини тасдиқламаган.
Eurofighter Typhoon самолётлари BAE Systems, Airbus ва Leonardo консорциуми томонидан ишлаб чиқарилади. Бу консорциумда фақат Буюк Британия энг сўнгги модель учун буюртма бермаган ягона давлат саналади.
Шу билан бирга, Буюк Британия 2030 йилгача яна 27 та F-35 жангувчи самолётини харид қилишни режалаштирмоқда: уларнинг 15 таси — F-35B (авианосецлар учун мўлжалланган), қолган 12 таси — F-35A бўлиб, улар тактик ядровий қурол олиб юриш имкониятига эга.